Түнкү чоор

Кошунамдын короосундагы анарды даңктайм

Кошуна жубан жашаган,

Короосу гүлдүү кашаадан,

Күрөң боз тамдын жанында,

Күн чыгыш айнек жагында,

Ар кимдер сугун салар бар,

Артыкча бышкан анар бар.

Күн чайкап кызыл, чатырайт,

Ай ыргап буурул, чачырайт.

Бариктүү, жашыл бутагы,

Башкача жылуу кучагы.

Атайын арзып туш болот,

Ар түркүн көркөм куш конот.

Асманга жылдыз толсочу,

Ал мен да бутак болсомчу,

Көйкөлтө шамал урсачы,

Көйнөгүн сылап турсамчы.

Караймын ичтен жабыга,

Каалгасы жабык дайыма.

Аптыгып жүрөк дирилдей,

Айнегин тиктейм билинбей.

“Үмүтүң үз!” – деп айтылуу

Үлпүлдөк парда тартылуу.